يعطيك العافيـة يا بو احمـد على الموضوع الحلـو
اولاً واخيـراً السبب هو المدرب ديليـو روسـي !
مدرب ما عنده شخصيـة .. نهائياً ما عنده شخصيـه
فالح بس يهايط قدام التلفزيون وان الاستقالة من شيم الجبناء !!
مدرب ( صرّف ) اللاعبين اللي يمتلكون حضور قوي وشخصية بالملعب !
مثل دي كانيو و بيروتزي و موتاريللي و مودينغاي و ستينداردو
والتصفية هاذي ناتجـه عن ان روسي يبي الفريق يكون مجموعه من اللاعبين الحليلين !
ما يسولفون ما يتكلمون يطلعهم يلعبهم يركنهم على الدكة 100 سنـة ولا يقولون شي !
وهالشي انعكس بشكل كبيــــــــــــر على فريقنـا !
واصبح فريقنـا معدوم الشخصيـة !
امبروسيني يسدح سيفيليا وبعدها يروح يسجل هدف !
بكل بساطـه ! .. حتى لو كان الهدف فيه خبث من سينديروس و كاكا
ومسألة روكي يوم انتقد المدرب انه جاهز هو ولعب بانديف وهو مصاب و راجع من مباراة مع المنتخب المقدوني في مباراة بولونيا
لو هي على كيف روسي كان شفناه طلب رحيل روكي لأن روسي ما يبي احد يتكلم ولا يقول شي
حتى بتصاريحه بخصوص هالمسألة وفكرة انتقاله للانتر و الفيولا كان روسي عنده الموضوع عادي لو انتقل روكي
بتكلم عن نقطة ثانيـة وهي روح الفريـق !
للأسف هالروح معدومـه نهائياً !
اغلب اللاعبين وابصم بالعشـرة ياخذون من اسـم لاتسيـو اسم للشهـرة
وشهرتهـم وبعدها يفكرون بالانتقـال
لأن مباراة واحده كفيله انها تشهرهم على مستوى العالم الرياضي
وهي مباراة الديربي !
فـ حنا نشوف اللاعبيـن ما يلعبون للنادي من قلـب
نشوف لورينزو يحاول يقدم كل اللي عنده يبكي على الخسارة لأنه لاتسيالي صميم
نشوف فيرماني معصب وغاضب ويتدخل وهو احتياطي
لأنه مولود في روما و مشجع لـ لاتسيو من الصغـر
اما الاغلبيـة العظمى ماخذيـن لاتسيـو للشهـرة ولـ شهرة اساميهم
فـ روح الفريق معدومـه .. وما عندنا مدرب يزرع هالشغلة في نفوس اللاعبيـن
لأن المدرب اساساً ما عنده روح للفريـق !
النقطـة الثالثـة وانت ذكرتها البنيـة الجسمانيـة
اتفق معاك عليهـا بو احمـد واختلف معـاك !
الكرة الحديثـة تحتاج لـ لاعبين او 3 لاعبين يمتلكون بنيـة جسمانيـة هائلـة
اما اللي يحتاجـه الفريق وهو سبب بروز العديد من الانديـة في اوروبا
السرعـه !
نادي اشبيليـه مع خواندي راموس !
وش اللي نفعهم وخلا من اشبيليه اسم قوي !
السرعـه !
لاعب مثل نافاس شنو المهارات اللي يمتلكها
السرعـة .. يركض ومحد يلحقها على الجناح ويرفع !
دييغو كابيل نفس الموضوع ! بويرتا اللي مات نفس الشيء !
ادريانو و الفيـس نفس الموضوع
كل واحد فيهم عنده مهارة بسيطة زايده عن الثاني بشوي
لكن الموضوع الاساسي والبارز فيـهم السرعـة !
الكرة الانجليزيـه اتجهم للشي هذا بشكل كبيـر
فـ هذا الشي هو اللي طور الدوري الانجليزي .. لأن كل اللي فيـه يركضون وسريعين
خواندي راموس نفسه يوم راح لـ توتنهام حاول انه يصنع اشبيليـه انجليزي
واعتقـد انه نجـح .. لكن اللي انصدم فيه راموس ان كل الاندية بالدوري الانجليزي يعتمدون على السرعـة
فـ ماقدر يجاريهم بالشغلة هاذي عكس الدوري الاسباني اللي فيه اندية قليله تعتمد على موضوع السرعـة !
حتى في بطولة اليورو الاخيرة الاسبان تفوقوا بالبطولة والسبب الاكبر السرعـة !
الكرة الحديثـة تعتمـد على لاعبيـن سريعيـن وما يتعبون .. يهاجمون بسرعة ويرجعون للدفاع بسرعـه
ودليل آخر على كلامي الكرة الايطاليـة اصبحت متراجعة قدام الكرة الانجليزية و الاسبانية في المحافل والبطولات الاوروبيـة !
هاذي النقطـة مهمـة حيـل ولو ينتبـه لها المدرب راح تشكل فارق كبير !
يعني فريقنا من فيـه سريـع !
فوجيا روكي زاراتي لورينزو دياكيتـه !
والبقيـة مثل بانديف وليشتستاينر و كولاروف و روزينال وكريباري بالمرتبة الثانيـة
اما البقيـة بطيئين لدرجـة كبييييييييرة !
يعني خط الوسـط وهو الخط اللي يربط بين الدفاع والهجوم !
ليديسما = بطيء
بروكي = بطيء
دابو = بطيء
مغني = بطيء
مانفرديني = بطيء
فيرماني = بطيء
لازم المدرب يطلب من الرئيس لاعبين سريعين حتى لو مهاراتهم لك عليهم
لكن دام سريعين هالشي راح يحل امور كثيـرة !
اودونيزي و روما و سامبدوريا تطوروا والسبب انهم بدؤا يعتمدون على اسلوب الكرة الحديثـة
البحث عن لاعبيـن سريعين بالدرجـة الاولـى !
مدربنا الدلـخ لازم يشوف الانديـة اللي حوله وشنو سبب تألقهم !
شنو سبب لعبهم الحلـو ! حتى لو خسروا تشوفهم مقدمين مستوى طيب !
في كلام كثير وضاع مني
الله كريم والله المستعان
يعطيك العافيـة بو احمـد على فتح باب النقاش
وان جد جديد بنرجع نناقش
فمان الله