يعطيك الف عافيه يا خالد على الموضوع الجميل و الرائـع
بصراحـة اشوف انك قسيـت بعض الشيء على بعض اللاعبيـن
عموماً السؤال المحوري للموضوع هذا هل لاتسيـو قادر على حصد بطولة الدوري خلال الخمس مواسم القادمـه ؟
محد يعلم الغيب اللا رب العالميـن
ولكن اجابـة على سؤالك بالفريق الحالي ممكن نوصل لـ اوروبا فقـط
اما المنافسـه فـ هي بعيـد المنال
و الاسباب ما هو ضعـف فقـط في بعض العناصر بالفريـق
ولكن ابرز الاسباب ( من وجهة نظري ) الضعف على مستوى كرسي التدريب و ايضاً الاستقرار النفسي للفريـق
ابي اخذ بعض الامثلـه قبل استرسل بالنقطتيـن اللي ذكرتهـم
على سبيل المثال فريق مثـل نادي الانتـر
كان يمتلك قبل فترة الكالتشيو بولي افضل فريق بالعالم من حيث ( العناصـر )
يعني كان عنده لاعبيـن ممتازيـن في كل مركز
وكان عنده احتياطيين ينافسون الاساسيين
وكان عنده ( باك اب ) احتياطيين طوارئ ممتازيـن
لكن كانت مشكلتـهم في المدربين و الاستقرار النفسي للفريـق
فـ كانوا المدربين ماهو مدربيـن بطولات كانوا فقط مدربين ممتازيـن
وايضاً مشكلة الاستقرار النفسي للفريق ان موراتي كان يتحكم في الميركاتو دون الرجوع للمدرب
كدّس الهجوم بـ لاعبيـن خيالييـن و صار محد يعرف منو الاساسي و منو الاحتياطي
كان يشتري اي لاعب يبزغ اسمـه دون الرجوع للمدرب مثل بيتزارو التشيلي و ايمري التركي و فان دير ميده الهولندي و غيرهم كثيــر
يوم وصل مانشيني لهـم انحلت مشكلـة المدرب
ومانشيني قدر يحقق الاستقرار النفسي للفريق
من حيث اللاعبين اللي يبيهـم و اللي ما يبيهم و اهدافه بالميركاتو
فـ مشكلـة لاتسيـو حاليـاً هي هالشغلتيـن المدرب و الاستقرار النفسي للفريـق
فـ المدرب ريجـا مدرب جيد و ممكن يكون ممتاز و لكنه ما هو المدرب اللي لاتسيـو قادر ياخذ خطوة كبيـرة جداً عن ما كان عليـه الفريق مع روسي و بالارديني !
يعني مع ريجـا ممكن اذا توفر الاستقرار النفسي للفريق معاه
مركزنا يمكن بـ يكون بين السادس و التاسـع
اما الاستقرار النفسي للفريـق للأسف هالشي معدوم انعدام كلي تماماً في لاتسيـو
لأن الثلاث اشياء اللي تحقق لك الاستقرار النفسي كلها معاكسـه لـ لاتسيـو
1 - بعض المشاكل الاداريـه
2 - العاطفيـه الكبيـره لـ جماهير لاتسيـو
3 - الاعلام الايطالي مع لاتسيـو
بعض المشاكل الاداريـه عارفينها وما تحتاج ذكر
اما العاطفيه الكبيـرة للجماهيـر هاذي بحد ذاتها مصيبـه كبيـرة
وهالشي ما هو بس في لاتسيـو للعـرب بل في جميـع جماهيـر لاتسيـو
و العاطفـة الكبيـرة هاذي كبرت و زادت حيل بعد افلاس لاتسيـو و المشاكل اللي صارت معـه
فـ على سبيل المثال ساباتيني سبق ان ذكر بـ نفسه انه عجز عن ضم اربعة لاعبيـن في موسم دوري الابطال و فشل في ضمهم لـ مساعدة الفريـق في البطولـة الاوروبيـه
فـ الجماهير بدأت بـ ذمه
اما الحيـن لو تدخل على المواقع اللاتسياليـه بـ تشوف مديح غير طبيعي لـ ساباتيني
و ان الاخطاء كانت من لوتيتـو فقط مو من ساباتيني و غيره و غيره
و صاروا يتغزلون بالصفقات اللي سواها مع باليرمو و الصفقات اللي كانت له يد فيها يوم كان مع لوتيتـو
لكن لو نترك العاطفـه شوي على جنب و نقيـّم عمل ساباتيني
هو من ناحيـة جلب المواهب ممتـاز
طيب من ناحيـة جلب اللاعبيـن الكبـار او اللاعبيـن المعروفيـن !! ؟
فشل فشل ذريـع ؟ يعني مايستروفيتش مدافع منتخب السويد كان احد الاهداف يوم كنا بدوري الابطال و فشل في اقناعـه و شراءه ؟
باتاليا محور بوكا جونيورز فشل في اقناعـه
فـ عاطفة الجماهير الكبيـرة للأسف عكسيـه بشكل كبيـر على نادي لاتسيـو وما تخلي النادي مستقـر
ولو فرضنـا دام ان الحديث عن باليرمو ان لاتسيـو سوى مثل ما يسوي زامباريني مع باليرمـو
باع زاكاردو و بارزاغلي و باع اماوري و باع كايير و هذول كلهم كانوا من نجوم باليرمو
لو قلبنـا الآيـه و قلنا لاتسيـو راح يبيـع رادو و دياكيتـه و زاراتي في صفقات قويه و مفيده للنادي
راح تشـوف الدنيا تقـوم و لا تقعـد عند الجماهيـر و ممكن يذبحون لوتيتـو على الرغم ان الصفقات ممكن تكون ذات فائدة كبيـرة جداً للنـادي
مثل ما هو صاير الحين مع كولاروف .. النادي خسر لاعب مهم و عنصر اساسي بالفريق لكن بالعائد المادي اللي جاء منـه قاعـد يشتغل صـح
وانا اجزم انه لو لاعب آخر غير كولاروف اللي انباع كانت الجماهير راح تسوي مشاكل بسبب هالبيعـه
لكن كولاروف و الجماهير كانت علاقتـهم سيئـة جداً بالفترة الاخيـرة
اما الاعلام الايطالي فـ هو مسلـط على لاتسيـو بشكل غريب اشاعات و اخبار مدري وشلون قايله دايم تطلع على لاتسيـو
يعني من شفنا زاراتي صار احتياطي الصحافـة ركضت و اتصلت على اخوه و تسأله عن رايـه .. و اخوه بدال لا يهدي الاوضاع يزيد النار حطب
وهالاشاعات تكثر و تزيـد و المتضرر لاتسيـو
فـ هالثلاث نقاط هاذي هي اللي تخلي لاتسيـو معدوم الاستقرار نفسياً لأن كل شيء ضده للأسـف
الحلول من وجهـة نظري هي جلب مدرب قادر على اعطاء دفعـه معنويـه كبيرة للفريق
و مدرب قادر يزرع عقليـه الفوز و لا شي غير الفوز في نفوس اللاعبيـن لـ تحقيق البطولات
ومن وجهة نظر شخصيـه انا اشوف اثنيـن فقـط قادريـن حاليـاً انهم ياخذون لاتسيـو لـ خطوة قدام
وهالخطوة ما هي خطوة البطولات و لكن خطوة الثبات بأن يكون لاتسيـو فريق يشارك باستمرار في دوري الابطال
وهالاثنين هـم ميهايلوفتش و سيميوني 
اعتقد انهم قادريـن يخلون نادي لاتسيـو اقوى مما هو عليـه و يخلونه يتواجد بـ اوروبا دائم
و بعد هالمدربيـن عاد نجيب مدرب معروف و قوي باوروبا يقدر يخلينا ننافس على الدوري
ولكن كل شيء لازم يمشي خطوه بـ خطوه .. فـ الخطوة القادمه هي بحاجـة لمدرب يزرع عقليه الفوز باللاعبيـن و اشوف ان ميها و سيميوني هم افضل من هو موجود للسير على هذه الخطوة
اما مسألة الاستقرار النفسي افضل حل لهـا هي تدعيـم الادارة بـ اداريين معروفين و محنكيـن
اداري يتعامل مع الجمهور و اداري يتعامل مع الصحافـة و اداري يتعامل مع اللاعبين و الفريق
وبكذا نكون قطعنا الاشاعات بالصحف و بكذا نكون رجعنا العلاقات الايجابيه مع الجماهير
وبكذا نكون حلينا مشاكل اللاعبين داخلياً سواء من هو اساسي او احتياطي او مسألة العقود و التجديد وهكذا