إذا بطولة عادية (مثل الكوبا إيتاليا) تتسبب في ظهور فرصة أخرى لتحقيق بطولة (السوبر الإيطالية)
أنا معها و بقوة
و إذا مركز يعتبر عادي في الدوري (ومؤهل للإتحاد الأوروبي) أنا معه و بقوة أيضاً
لاتسيو فاقد الظهور في الساحة الأوروبية (بإستثناء موسم الأبطال) لمدة 3 مواسم خلال
آخر 5 سنوات
اغلب اللاعبين ما عندهم خبرة اللعب في بطولات أوربية و أيضا هذا انعكس على روسي
روسي ما كان عنده الخبرة الكافية بالموازنة بين المشاركة الأوروبية و المشاركة المحلية
و كلنا شهدنا كيف سقط الفريق بالقسم الثاني من الموسم اللي شارك فيه بأبطال أوروبا
لوتيتو لازم يدعم الفريق على الأقل لدرجة انه يقدر يحقق فرص المشاركات في البطولات الأوروبية
من خلال الفوز بالكأس أو الوصول لمراكز مؤهلة
و احنا كجمهور نعرف زين النواقص حتى يوصل الفريق لهذا المرحلة وبصراحة ما أتصور
انها صعبة على لوتيتو انه يحققها
لكن العلّة في المدرب روسي
ما أخفيكم اني بعض الأحيان ما ألومه بالنتائج لأن اللاعبين يخذلوه
لكن اللاعبين ما خذلوه إلا بسبب اختياراته
وبالحالة هذي الخطأ مشترك بين اللاعبين و المدرب
أنا متواضع و ما أطالب بفريق يحقق بطولات
لكن أمنيتي ان لاتسيو يبقى في الواجهة بشكل دائم سواء بالمنافسة المحلية أو الظهور
في البطولات الأوروبية في كل موسم لأن الفريق فيه لاعبين شباب ، ولو استمرت مشاركاتهم
و احتكاكاتهم بالفرق الأجنبية الغير إيطالية راح يتطور مستواهم كثير عن الحالي
بالنسبة لــ سيرجيو كرانيوتي
فأحلى صفقة سواها كانت البوبو فييري
بالسابق كنت عاشق و متيم باللاعب ريفالدو و أتابعه من أيام الديبور لحد وصوله لـ برشلونة
في موسم 97 ، المنافسة على لقب الهداف كانت حامية بين ريفالدو و البوبو وإذا ما خانتني
الذاكرة انتهى الموسم وكل واحد منهم سجل 24 هدف وتعادلوا
انتهى ذاك الموسم ولحد الحين ما أنسى هدف البوبو من الخط القريب من الزاوية و سجل هدف
إعجازي ، و لأنه منافس ريفالدو في ذاك الموسم تابعته كثير و عجبني جداً مع الوقت
و بالمصادفة ان البوبو هو سبب معرفتي بــ لاتسيو بعد انتقاله من الأتليتكو مدريد
ومنها صرت متابع لـ لاتسيو ولو ان في فترات كانت متقطعة لحد ما انخمد عشقي للبارصا
برحيل ريفو
كل هذا أبغي أوصل لنقطة وحدة منه
لولا كرانيوتي وصفقة البوبو ما عرفت لاتسيو
اللي سواه كرانيوتي صعب يتكرر ،، وكل صفقاته كانت ناجحة إلا الموسم الأخير له مع النادي
لوتيتو ما مطلوب منه يقلد كرانيوتي
الفريق بس محتاج كم صفقة في الوسط و الدفاع و ممكن مهاجم صندوق مثل أكوافريسكا
مع تغيير المدرب يصير فريق ممتاز و قادر يوقف مع أي نادي حتى ولو يخسر لكن مو مثل
هذي الطريقة اللي نشوفها بالوقت الحالي
يعطيك العافية أخوي جاسر ، فرصة حلوة ان نفضفض شوي 