بخصوص اللاعـب الاسرائيلـي [ يرجى الدخول للضروره ]

[The Game]

بسم الله الرحمن الرحيم
السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

والله مدري شلون ابـدأ
انا طبعي اذا قعدت افكر لزوم افتـر و اطقطق كورة
بس ما عندي كوورة الحيـن ما غير امسط من هالزقاير عسى الله يفكنا منهـا

انا عندي قنـاعـة وهي مو قنـاعـه هي شي غصـب عن خشمي
الديـن يدخـل في كل شي

يمكن كلامي ما يعجب بعض اخواني ومنهم الاداريين بس هاذي حقيقـة

الديـن يدخل في كل شي .. حتى في منتدانا وحتى في لاتسيـو

يا اخي حتى المتزوج لا جاء يعرّس مرتـه لزوم يذكر له دعاء للجماع
يعني حتى في شهوتـه الديـن يدخل فيهـا

فـ اقول لـ اخواني كافـه كلهم اللي بالمنتـدى
ما قصرتـوا و بارك الله فيكـم والله يجعل كلامكم و وقفتـكم في ميزان حسناتـكم


بـ استشهد في مثـال بسيـط قبل ما ابـدأ كلامي عن اللي صايـر او اللي صار بـ خصوص موضوع اللاعـب الاسرائيلي

الكل عارف اني من الكويـت و انه قبل فتـرة اعطوا الحريـم حقوقهـم السياسيـة

شيـخ مسجدنا الله يحفظـه محمد ضاوي العصيمي تلميذ لـ ابن عثيمين و ابن باز الله يرحمهم

تكلم في ذيك الفتـرة بـ خطبـة الجمعـة عن حقوق المرأة السياسيـة
وان الاسلام كفل حقوق المرأة بشكل تـام

وجاب مثال ان البيـت كامل ومرمم بالكامل تجيـب طابوقـه زيادة تبي تحطها على البيـت ما يصيـر !!

الحاصـل يا الربـع

ان وزارة الاوقاف الله يصلحهـم وقفـوا شيخنا بو عبدالله عن الخطابـه و وقفوا شيوخ كثير عندنا من ضمنهم بعـد التميمي عثمان الخميس مسجده في جليب الشيوخ

فـ شيخنا محمد ضاوي كانت له سفرة للرياض يدرسون هناك ومعاهم اخوي مشاري الله يخليه لي ^_^
وكلموا المشايخ هناك عن اللي حاصـل

تدرون وش كان رد مشايخنا وعلمائنا بالسعوديـة لـ محمد ضاوي

قالوا له احسن انت ما تفهم !!

قالوا مستحيل صخرة توقف قدام مجرى النهـر يعني انت مستحيل توقف قدام التيـار
خلاص خلك معـه واللا لا تتكلم عنـه لأن ما راح تسـوي شي

بالعكس انت خسرت منبرك وما تدري منو راح يصير مكانك
يمكن يجي واحد مو صاحي واحد راعي بدع يلبــّس على عامـة الناس في بعض الامـور


فـ اللي ابيـه من هذا المثـال كلـه هـو هالكلمـة

مستحيل صخرة توقف قدام مجرى النهـر يعني انت مستحيل توقف قدام التيـار
خلاص خلك معـه واللا لا تتكلم عنـه لأن ما راح تسـوي شي

فـ حنا هنا كـ عرب و كـ مسلميـن
صوتنـا ما هو واصـل لـ لاتسيـو و لا لـ لوتيتـو

وحتى لو فرضنـا انـه وصل هنـاك ما راح يشكل يمكن 1 % من قراراتهـم


و ربي واللي خلقنـي اني عادكم اخواني و ربعـي
قسم بالله اكحف من هالزقايـر من هالضيقـة اللي فيني الحيـن

اسرائيلي و دينماركي ملعونين والديـن

نزعـّل بعضنـا عشانهم ونخسر بعضنـا لهـم

لا ابوهم لا ابـو كلـب لا ابـو لاتسيـو و لوتيتـو فوقهـم بعـد


محـد موافـق على تواجدهـم ابـداً ابـداً واللي يقول غير هالكـلام يحاول يكذب على نفسـه
محدد يشكك فـ اسلاميـة الثانـي و محد يشكك في ديـن الثـاني

يا اخي كلنـا عندنـا قصـور في طاعـة اللـه

انا انا اللي اكلمهـم الله يلعن لاتسيـو ويلعن الساعة اللي شجعتهم فيهـا
مرات أأخـر صلاة المغـرب عشان بس اكمل متابعـة المبـاراة


يعني حنا وش بـ يدينـا بيجي هالاسرائيلي التبـن ويمكن يطقهـا اساسي بعـد
وش راح نسـوي ما حنا قادريـن نقول حق لوتيتـو لا تلعبـه ما نبيـه

ان شاء الله الجماهير اللاتسياليـه تصرعـه واللا تذبحـه واللا تخطفه وتفكنا منه مهما كان لاعـب ممتـاز


هالموضوع مشابهـه لـ موضوع بن عيون و جماهير ليفربـول
زعلوا و تضايقـوا وللأسـف ربع تفرقـوا عن ربعهـم

وهذا بن عيون يطقها اساسي ويجيب اهداف بعـد


تكفـون يالربـع تكفـــــــوووون
لا تخلونـا نخسـر بعض ونشيل بخاطرنـا على بعضنـا
عشان لاعـب اسرائيلي واللا دينماركي

لو انه نادي عربي وعندنا قريـب وحنا نشجع هالنـادي
بـ نولـّع بالنادي واللي فيـه

بس حنا ويــــن و رومــا ويـــن

والله اني اكتب هالكلام وانا مغبـون وماني عارف اوضح الموضوع عـدل

زبـدة الموضـوع ان جانا هالاسرائيلي ولعـب
عدّوه مانفرديني واللا ماكينـوا لاعـب زايـد عن الحجـة ولا احد يدانيهـم

ليـه نخسر بعضنـا قيسـوها بالمنطـق
مسلم يخسر اخوه المسلم عشان صهيونـي

لا والله اكسب اخوي المسلم واحطه فوق راسي وفوقهـا حبـّه خشـم بعـد
والاسرائيلي اعطيـه طاف ولا اطق له خبـر

وان ما اقنعـكم هالكلام كلـه

فـ انا اخوكم عواد المطيـري طالبـكم وداخل عليكـم
لا تزعلون من بعض ولا تشيلون بخواطركم
ولا تسبـون و عينوا من الله خيـر

وان ما انفعت عاد هالطلبـه

ترى قسم بالله بـ فصل عليـكم
واسكر المنتدى و اغير الباسوورد

حتى الويبماستر عبدالرحمن ما اعلمـه عنه
واقفل المنتدى لـ اسبوع او اسبوعيـن

وانتم عاد كيف الله فيكم ^_^





يقولكم واحـد نذل يوم مات ابـوه يبون يغسلونـه
قال لالا لا تغسلونـه .. مسبحينـه أمـس

ههههههههههههههههههههههههههه


اضحكوا عاد وفلوا حجاجكم
و وسعوا صدوركم


وقسم بالله ان معرفتـكم تسوى لاتسيـو و ما وراء لاتسيـو

والسموحـة على الاطالـه

[كاسترومان]

ما أقول غير والله كبير يا عواد

[متيم لازيو]

اقول هذه قصة مو بإعلان

اصبر أقراها كلها وأرجع

[متيم لازيو]

يلومونا فيك يا عواد

شف ماعندي تعليق أكثر من هذه

:aa_m obi:

:aa_m obi:

[بو سلمان]

ابشر يا عواد و ترى الامور طبيعيه ..

باالنسبه لي شخصيا ً كان استغراب اكثر من انه استنكار .. قلنا في الردود السابقه ان النادي لاهو مسلم ولا شي و حر بتصرفاته ..

بس استغربت من الصفقه خصوصا ً اننا كلنا نعرف تاريخ لاتسيو مع اليهود ..

الامور طيبه ابشرك و الشباب في المنتدى ربع و اخوان ان شاءالله و بيض الله وجهك و كثر الله من امثالك ..

كفو ..

[Ben Nasser]

قواك الله ياعواد

وش نسوي قهرنا لوتيتو بهالحركه

و السالفه كلها فضفضه وماتوصل للزعل ان شاء الله

ومثل ماقلت كلنا اخوان

[lazio2010]

بارك الله فيك والله يكثر من امثالك ..

اتمنى من الاخوان محد يعطي الموضوع اكثر من اللازم لان اللاعب ان شاء الله ما يتوفق وتصير ضجه

وبيعدين يبيعونه ..

[hchammout]

لا لا, ان شاء الله الكل اخوان وحبايب, الموضوع مش اكثر من استياء تجاه ما حصل...

[fahad]

اذا يهودي و بينفع الفريق حياه الله الرسول اللهم صلي و سلم عليه كان يشتري السلاح من يهود المدينه و بعدين ياجماعه الخير ترا الدين موب كذا والله ولا يضيع الدين و الناس الا كثره الاغط و الكلام فيه

اذا تغار على دينك احسن عملك
اذا تغار على دينك احسن تعاملك مع البشر جميعا الكافر قبل المسلم
اذا تغار على دينك اصنع و طور
اذا تغار على دينك اجعل حافظ على وطنك


و شجع الفريق الى تبي

للمعلميه هذا 3 لاعب يهودي في لاتسيو بعد ستام و كان فيه واحد ثاني نسيت اسمه و هذا الثالث

و سلامتكم

[Laz!o]

المشاركة الأصلية كتبت بواسطة fahad

اذا يهودي و بينفع الفريق حياه الله الرسول اللهم صلي و سلم عليه كان يشتري السلاح من يهود المدينه و بعدين ياجماعه الخير ترا الدين موب كذا والله ولا يضيع الدين و الناس الا كثره الاغط و الكلام فيه

اذا تغار على دينك احسن عملك
اذا تغار على دينك احسن تعاملك مع البشر جميعا الكافر قبل المسلم
اذا تغار على دينك اصنع و طور
اذا تغار على دينك اجعل حافظ على وطنك


و شجع الفريق الى تبي

للمعلميه هذا 3 لاعب يهودي في لاتسيو بعد ستام و كان فيه واحد ثاني نسيت اسمه و هذا الثالث

و سلامتكم

عين الصواب

اللاعب الثالث أعتقد انك تقصد آروين فينتر الهولندي
لكن بعد هناك كاسترومان و سورين أيضاً يهود