( توضيـح ) بـ خصوص الجواز الاوروبي و اللاعبيـن الاجانـب
بسم الله الرحمن الرحيم السلام عليكم ورحمة الله وبركاته الحمدلله والصلاة والسلام على رسول الله وعلى آله وصحبه أجمعين
فـورزا لاتسيـو دائماً و ابـداً و لا عـزاء للاعضاء المنشقيـن اللي انتقلوا لـ تشجيع نادي رومـا ( كاسترومان + بو سلمان + nesta )
ندخل في موضوعنـا و هو الجواز الاوروبي و مشاكلـه و عدد اللاعبين الاجانب و مشاكلهـم و قرارات الاتحاد الايطالي الفاشله ومشاكلهـا
في لبس كبيـر جداً جداً بالموضوع عند بعض الاخوان ولاحظت هالشي في بعض الردود
راح اكتـب اللي اعرفـه على امل ان توصل الفكرة العامـة للموضوع .
في البدايـة مقارنـة بسيطـة قبل ان ندخل في صلب الموضوع بين الاتحاد الايطالي ( الفاشل ) و الاتحادات الاوروبية الاخرى في ابرز الدوريات المعروفه .
اذا اخذنا الدوري الاسباني كـ مثال .. الاتحاد الاسباني يشترط تواجد 25 لاعب فقط يتم تسجليهم بالدوري و 6 لاعبين تقدر تلعبهم دون تسجيلهم من الفريق ب و 6 لاعبين ثانيين تقدر تلعبهم من فريق الشباب .
بالنسبـة للاعبين الاجانب بالدوري الاسباني .. الاتحاد الاسباني فاتح لك باب ( الشراء ) على مصراعيـه ( لكن ) اللي تقدر تسجلهم بالدوري ضمن الـ 25 لاعب هم ( 4 لاعبين فقط ) .
و نروح للدوري الفرنسي .. الاتحاد الفرنسي ما عنده مانع من عدد فريقك ان شاء الله مليون .. ولكن نظام اللاعبين الاجانب مثل الدوري الاسباني .. الاتحاد الفرنسي فاتح لك باب ( الشراء ) على مصراعيـه ( لكن ) اللي تقدر تسجلهم كـ لاعبين اجانب ( 4 لاعبين فقط ) .
الدوري الهولندي زيطــه .. الاتحاد الهولندي مو حاط اي شروط نهائياً للأنديـة .. تقدر تشتري لاعبين اجانب على كيفـك .. و تقدر تلعب الاجانب كلهم بالفريق .. يعني لو نسوي منتخب الخليج واللا منتخب العرب ومحد فيهم عنده جواز اوروبي يقدرون يلعبون كلهم في نادي هولندي .. ما في اي شروط ابداً .
الدوري الانجليزي كذلك ما فيه اي شروط .. هو مجرد شرط واحـد مو من الاتحاد الانجليزي هالشرط من الدولـه بس و اعتقد ان هالامر يسري على كافـة دوريات بريطانيا .. الانجليزي و الاسكتلندي و الايرلندي الخ الخ .
الشرط الوحيد بالدوري الانجليزي للاعب الاجنبي انه لازم تكون عنده رخصـة اقامـه انه يقعد بالبلـد .. و الرخصـة هاذي يطلعونها الانديـة انهم يسجلون اللاعب الاجنبي كـ موظف بـ أحد الشركات الحكومية بـ بريطانيا و بالطريقة هاذي تكون عنده اقامـه فـ يقدر يلعب مع النادي الانجليزي .
الاندية الكبيرة بـ انجلترا ما تعاني من هالشي .. مثال على ذلك اندرسون لاعب مانشستر يونايتد بـ نفس يوم وصوله لـ انجلترا من نادي بورتو طلعوا له رخصة اقامه وانه موظف بـ أحد الشركات الحكوميـه .
اما لاعبنـا نشأت اكرم يوم كان قريب من مانشستر سيتي ما قدروا يطلعون له .. الفيتنامي رئيس النادي بـ ذاك الوقت ما عنده واسطات .
الدوري الالماني بصراحـة ما عندي اي علم عن قوانينـه بس اجزم انها ابرك مليون بالالف من الاتحاد الايطالي الفاشل .
الحيـن نبـدأ بالمشكلة الرئيسيـة اللي تتعلق بـ الاتحاد الايطالي و بـ فريقنا لاتسيـو .
قوانين الاتحاد الايطالي الخاصـه باللاعبين الاجانـب لهـا 3 أفـرع وكل فرع فيهم منفصل عن الثاني بتاتاً .. و هالشي هو اللي مسبب لخبطه للبعض .
الفرع الاول العدد المسموح للاعبين الاجانب التواجد بالفريق هـم 5 لاعبيـن .. و بالنسبـة لـ لاتسيـو الخمس لاعبين الاجانب بالفريق هم كاريزو و اندريه دياز و ماتوزاليم و كولاروف و ماكينـوا .
الفرع الثاني هو شراء لاعبين اجانب ( من خارج ايطاليا ) و العدد بالسابق كان واحد و بعدها زادوه الى اثنين و الحين عشان فشل ايطاليا بـ كأس العالم رجعوه لـ واحد .
الفرع الثاني هذا مصيبتـه مصيبـه .. و سبق ان طحنا بـ نفس هالمشكلة بـ موسم دوري الابطال اشترينا كولاروف اللي يعتبر من خارج الاتحاد الاوروبي لأن صربيا مو مسجله نفسها مع الاتحاد الاوروبي على الرغم من انها في اوروبا .. و اشترينا كاريزو اللي حاول يطلع اصوله الايطاليه و لكن ما قدر .
في ذاك الوقـت كان القرار نفس القرار اللي طبقوه للتو شراء لاعب واحد اجنبي ( من خارج ايطاليا ) .. و بما ان كولاروف كان الشراء الاول لـ ذلك ما قدرنا نجيب كاريزو و خلينا كاريزو اعارة مع الريفر .
وبعد ما عدلوا القرار و خلوه اثنين جت من صالحنا اننا جبنا كاريزو و ماتوزاليم كـ لاعبين اجانب .
المصيبه الكبرى الآن تتحدد على الشراء الاول .. و حنا شرينا بينتوس كـ شراء اول فـ لذلك بينتوس لاتسيالي لاتسيالي مهما يصيـر .. يعني حتى لو وديناه اعارة و اشترينا ايدرسون مثلاً بـ يكون بينتوس هو الشراء الاول وما نقدر نسجل ايديرسون اللا الموسم الجاي لأن ايدرسون هو الشراء الثاني .
و على كلام بينتوس في تصريحه الاخيـر ان اللاعب وقع رسمياً مع الفريق يعني الموضوع انتهى و خلاص .. ما في لا هيرنانديز و لا ايدرسون و باريرا ولا بطيـخ .. اللا في حالة شريناهم نعيرهم عشان يجوننا الموسم القادم .
وما نقدر نلغي الصفقة لأن بينتوس وقع معانا .. وما نقدر نفسخ العقد لأننا دافعين فيه فلوس و لأنه يعتبر الشراء الاول .
ما في غير حل واحـد عشان تتكنسل صفقة بينتوس رسمياً .. انه يفشل بالفحص الطبي أو اننا ( نخبثها ) و نقول انه فشل بالفحص الطبي وهو سليم معافى ما فيه اي شي .
يعني مسألة الشراء غير و مسألة عدد اللاعبين الاجانب الموجودين بالفريق غيـر .. لحد يلخبط بينهم .
الفرع الثالث و هو شراء لاعبين اجانب ( من داخل ايطاليا ) .. ومثال توضيحي عشان توضح الصورة يعني مثلاً لو نشتري يانكوفيتش الصربي لاعب جنوى هو يعتبر لاعب اجنبي .. لكن يتم تسجيله عادي بالفريق لأنه لعب الموسم الماضي مع فريق ايطالي .
يعني مسألة تواجد عدم تواجد جواز سفر اوروبي لأي لاعب كان يلعب مع احد الاندية الايطاليه .. مسألة مو مهمـه و ما تدخل ضمن شروط الفرع الثاني اللي ذكرته فـوق .
يعني لو كارمونا التشيلي مثلاً ما عنده جواز اوروبي نقدر نشتريه عادي من دون اي مشاكل .
اتمنى يكون شرحي واضـح لأني شفت لبس عند بعض اخواني بـ مسألة اننا نودي بنيتوس اعارة و نجيب هيرنانديز او ايديرسون .. و حتى بعض المواقع اللاتسياليه اللي نترجم منها الاخبار يفكرون بهالشي .
وما يدرون عن قوانين الاتحاد الايطالي الرسميـه بخصوص هذا الموضوع .
يعني الحين لاتسيـو يطق اصبـع و ما له اللا التسوق من اوروبا او يدرون على واحد عنده جواز اوروبي .. او لوتيتـو يظبط علاقته مع بيرلسكوني و يخليه يطلع لـ بينتوس جواز اوروبي مثل ما سوى مع ثياغو سيلفا مدافع الميـلان .. طلعوا له جواز اوروبي ايطالي بين يوم و ليله و هو ما عنده اي صلة بـ ايطاليا .
و فورزا لاتسيـو دائماً و ابداً والله يستر علينا بالموسم الجاي .
أنت غير مسجل في مـنـتـدى لاتـسـيـو لـلـعـرب . للتسجيل الرجاء إضغط هنـا 
( توضيـح ) بـ خصوص الجواز الاوروبي و اللاعبيـن الاجانـب 
.
العرض الشجري
