السلام عليكم ورحمة الله وبركاته
حبيت أناقش معاكم ما تبقى من الدوري بخصوص الفريق .. خصوصاً وأن خسارتنا قدام بارما هي السادسه خلال ثمان مباريات !!!
لو نرجع نشوف المباريات الي خسرها لاتسيو والي عددها تسع مباريات .. والغريب بالموضوع أن كل هالخساير بنتايج كبيره ومن فرق مالها تاريخ وهذا يأكد ضعف الخط الخلفي ( جميع المدافع + حارس المرمى ) وتهاون اللاعبين
هذا الموسم دخل مرمانا لغاية أخر مباراة قدام بارما 37 هدف بينما فريق سيينا الي ينافس عالبقاء فدخل مرماه 31 هدف فقط .. يعني حتى دفاع سيينا وحراستهم أحسن من عندنا
صحيح أن ماركيتي قدم مباريات كبيره لكن أرتكب أخطاء كثيره خصوصاً بعدما رجع من الإصابه وهذا الكلام ينطبق على مدافعينا الي كانوا سبب ضياع الفريق في الكثير من المباريات
من دون نسيان ضياع خط الوسط والهجوم + تأليف المدرب ولوتيتو .. يعني الأخطاء الي حاصله الحين كلها مشتركه
بالنسبة للخساير الي خسرها الفريق هالموسم .. لو نراجعهم مع بعض ونشوف النتائج
لاتسيو 1 - 2 جنوى
لاتسيو 0 - 1 يوفنتوس
سيينا 4 - 0 لاتسيو
إنتر ميلانو 2-1 لاتسيو
بمرحلة الذهاب كلها خسرنا أربع خساير وبنتايج معقوله بإستثناء مباراة سيينا .. قدام فريق كبير مثل اليوفي وقدام فريق متواضع مثل جنوى وقدام فريق ينافس عالبقاء كل موسم وهو سيينا وبنتيجة تاريخيه .. وخسارة أمام الإنتر المتعثر هذا الموسم
بالنسبة لمرحلة الإياب
جنوى 3-2 لاتسيو
باليرمو 5-1 لاتسيو
لاتسيو 1-3 بولونيا
كاتانيا 1-0 لاتسيو
بارما 3-1 لاتسيو
الخساير الي نخسرها دايماً ما تكون نتيجتها كبيره وقدام فرق أكثر ما نقول عليها متواضعه أو مجتهده .. يعني لو أننا نخسر من فرق كبيره بهذي النتايج ممكن تكون حسرتنا قليله لأننا خسرنا من فرق كبيره تنافس على اللقب
لكن المصيبه أننا نخسر من فرق تنافس على البقاء + فرق همها الوحيد أنهم يكونون بالمركز العاشر هذي المصيبه
لاتسيو إذا يبي يثبت قوته مو شرط يفوز على ميلان ولا روما ولا مادري منو .. هذا ميلان ما فاز على أي فريق كبير بإستثناء روما لكنه فاز على كل الفرق الصغيره وهو متصدر حالياً
لأن الفرق الصغيره هي الي تحسم اللقب مو الفرق الكبيره .. شنو فادنا فوزنا على ميلان بإستثناء أننا كسرنا العقده صحيح وكسبنا ثلاث نقاط .. لو نقيسها بصوره ثانيه كأننا خسرانين هالموسم من ميلان وفايزين على جنوى مثلاً وكلا الحالتين ماخذين ثلاث نقاط ، يعني ماصار شي جديد .. بس مصيبتنا هي خسرنا قدام فرق أقل من عندنا مستوى على صعيد الفني واللاعبين
المباريات المتبقية صعبه وقويه وبصراحه بعد ما شفته من مستوى فاشل بالمرحلة الثانيه من الدوري ماصرت أتفائل حتى أننا نتأهل لليورو ليج الموسم الجاي
إذا عذر اللاعبين والإدارة والمدرب أن الإرهاق هو سبب تراجع مستوى الفريق .. فلازم يعرفون أنهم حتى إذا تأهلوا لدوري الأبطال هم راح يلعبون ثلاث مباريات في 10 أيام .. يعني المشكله راح تستمر
حل هذي المشكله أكيد هي التعاقدات الي أكيد راح يذبحنا فيها لوتيتو + على المدرب أنه ما يختار مجموعه صغيره تتكون من 25 لاعب حتى يلعب فيها موسم كامل في ثلاث بطولات لأنه راح يدخل بدوامة الإصابات مثل ماصار لنا هالموسم
بالنسبة للتنافس على دوري الأبطال
فالمباريات القادمه للفريق :
لاتسيو -- نابولي
يوفنتوس -- لاتسيو
نوفارا -- لاتسيو
لاتسيو -- ليتشي
أودينيزي -- لاتسيو
لاتسيو -- سيينا
أتالانتا -- لاتسيو
لاتسيو -- الإنتر
أربع مباريات داخل أرضنا ومثلها خارج أرضنا .. كل المباريات الباقيه صعبه وبصراحه جدولنا بنهاية الموسم بمثل هذي الظروف صعب لأبعد الحدود
بالأول تهاونا بالخصوم مثل بولونيا وكاتانيا وبارما .. وبالأخير من هالثلاث مباريات طلعنا بـ ( 0 نقطه ) ولو أننا أخذنا على الأقل 6 نقاط من هالمباريات كان نافسنا اليوفي على المركز الثاني يعني مانخاف على مركزنا الثالث .. بس بعد هالنتائج هذا يعني أننا حتى قدام نوفارا مو ضامنين حتى التعادل لأن الفريق مايعطينا الثقة حتى نثق فيه وبقدراته
لو نشوف الفرق القويه على سبيل المثال وهي ( نابولي + اليوفي + أودينيزي + الإنتر ) .. نابولي وأودينيزي ينافسون لاتسيو على مركز دوري الأبطال وهذا يعني أنهم ماراح يتفرجون قدامنا وأكيد راح يذبحون نفسهم حتى يحصلون على المركز الثالث .. أما اليوفي فمنافسته على اللقب + عدم خسارته أمام الكبار منذ سنوات + عدم خسارته أي مباراة هذا الموسم تأكد لنا أن لاتسيو أكييد خسران قدام اليوفي مو بسبب قوة اليوفي بل لأننا مانعرف نفوز عليهم .. أما الإنتر فصحيح وضعه متوتر والفريق متراجع لكن الأنتر فيما تبقى من الدوري راح يلعب حتى يدافع عن أسمه ويحجز له مكان باليورو ليج
أما المباريات أمام الفرق المتواضعه أو الوسط وهي ( نوفارا + ليتشي + سيينا + أتالانتا ) .. نوفارا هالموسم أحرج كل الفرق القويه بأرضه حتى وإن خسر قدام الميلان لكن قدم مباراة كبيره وأكيد هالفريق قريب من الهبوط لكن لازم يقدم مباريات كبيره بأخر الموسم حتى يتركون بصمه قبل الهبوط .. أما ليتشي فوضعه بالبقاء أفضل من نوفارا يعني راح يقاتل حتى النهاية وأكبر دليل الموسم الي طاف والحال ينطبق على سيينا ، أما اتالانتا فلولا الخصم كان شفناه في مركز مؤهل لليورو ليج وهالشي يأكد قوة الفريق مع كولانتونو + لاتسيو مافاز على أتالانتا في أرضه من أول ما صعد أتالانتا للسيريا أي موسم 2003
بصراحه أحنا بموقف صعب لانحسد عليه .. ويقول المثل إذا عرف السبب بطل العجب ، مشكلتنا الي أحنا فيها مسألة مشتركة مو بسبب المدرب بس ولا لوتيتو بس ولا اللاعبين بس .. الكل مخطئ وأكبر الخاطئين لوتيتو
وما يحزن في هذا الموسم هو تكرار ما حصل الموسم الماضي .. طوال الموسم كان ترتيبنا بين الأربعه الكبار وبالأخير تراجعنا للمركز الخامس .. وهالموسم متمسكين بالمركز الثالث وياخوفي بالنهاية بالمركز السادس أو السابع
أنت غير مسجل في مـنـتـدى لاتـسـيـو لـلـعـرب . للتسجيل الرجاء إضغط هنـا 
العرض العادي
